CIRCVLVS LATINVS LEGIONENSIS

De Festo Natalicio faustissime degendo

2011-12-25T05:16:00.000-08:00

Circulus Latinus Legionensis faustum optimumque Festum Natalicium vobis omnibus amicis sodalibus fautoribusque, quibus lingua Latina est cordi, degendum exoptat!

De proximo nostro conventu agendo

2010-11-06T12:47:00.000-07:00

Salvete sodales!

Gaudio plurimo mihi vobis nuntiare proximo die octavo mensis Novembris, die nempe Lunae, hora sueta, quae septima postmeridiana est, locoque autem insueto -causis diversis eisdemque hic haud referendis- proximum habebimus conventum, Deo videlicet intercedente.

Ubinam enim gentium conveniemus? In aula c. numerus 0.1, in pedeplanis, prope bibliothecam sita, quae optima nostris inceptis cum non sit, mox mutanda esse videtur: transmigrandum ergo mox mox nobis est, ut patet, novas enim provincias easque aptiores, amici amicaeque, explorare debemus...!

De argumento tractando, quid? En quicquam in antecessu: de tempore nostro aestivo, quomodo singuli nostri singulas ferias degere instituerit, quos visitaverit locos, quas urbes earumque monumenta lustraverit, quas omnium rerum actarum memorias comportaverit, et nonnulla alia plurima, quae coram corona a ceteris constituta rethorico modo si licet narranda sunt...

Addite quoque illud, quod imagines nonnullas Aloisii nostri nuperrime ipse accepi, quas carptim vobis monstrare volo, occasio optima quae erit ad vestram aperiendam opinionem, ut credam.

Et iam satis. Venite ad nos, linguae Latinae amatores, ne tardiores fiatis!

Valeatis in proximum!

De prima ad novum tempus sessione habita

2010-10-30T11:37:00.000-07:00

Salvete omnes, amici amicaeque nostrae linguae qui apud Legionenses curatis operamque datis!

Iam novam ad tempus novum quod attinet habuimus sessionem, cui quinque interfuimus Circuli nostri membra, Carmen nempe atque Pilar, debilioris sexus quod vocant (qua enim de causa id decursu saeculorum factum sit plane nescimus...) repraesentantes, Michael autem et Marcus et Petrus et Ansgarius ad fortiorem (quis diceret...).

De argumento eo ad futuras nostras sessiones agitando tractandoque nonnulla protulimus, hanc in rem omnes assentientes, ut non alienum videretur si paginas eas, quas nonnulli in Legionem urbem nostram Latine versantes sub nomine Vicipaediae non tam probe confecerint, quasi novas aliquantulumque lautiores ipsi nos quantum possumus componere et reformare conaremur.

Ceterum praeses ceteros sodales certiores fecit se novum ad probationem illam publicam concinnandam moderatorem apud Legionenses factum fuisse, qua occasione adhibita sapidum necnon oportunissimum -sic saltem credimus- colloquium instituimus de C. Iulio Caesare auctore ad discipulos iure proponendo, utrum enim is optimus ad Latinitatem colendam sit necne, captu necnon indole ingenioque discipulorum nostrorum perspectis. De qua re iam longius iterum atque iterum tractandum patet.

Ad finem sessionis Ansgarius nuntiavit novas scholas Latinas, easque vivas, apud Institutum Biblicum et Orientale quod vocant sibi agitandas, id quod omnes magno plausu gaudioque accepere.

Hactenus hodie. Valeatis quam optime, atque proximam nostram participate sessionem, interretiali saltem modo! Quomodo faciatis? Numquamne de programmate illo SKYPE audivistis? Benigni sciatis ad nos convenietis, venite!

Valeatis multum!

De Emeritensi conventu nuperrime habito...

2010-04-16T08:02:00.000-07:00

De novissimis nonnullis...

2010-04-08T04:31:00.000-07:00

Proximo Lunae die, die 12 huius mensis, ut bene scitis, Cursus noster ultimam celebrabit sessionem, cui Emmanuel Seoane, vir egregius magister qui linguae Graecae maximam dat operam idemque hodiernus nostrae Societatis Hispanae Studiorum Classicorum secretarius causa Cursus ex officio claudendi intererit.

Cuius enim sessionis argumentum maximam partem de novis eis, quae VI Itineribus ad Cultum Classicum proxime Emeritae habendis tracta necnon disputata ipse particeps reportaverim versabitur, additis documentis illis, sive chartaceis sive electronicis, ad vos tradendis hac adhibita occasione collectis.

Quorum Itinerum ergo en argumentum primigenium et calendarium:

Dolendum valde, quod hoc tempore solus Emeritam adibo...! Spero fore insequentibus annis nonnulli alii, idemque Legionenses, convenire possint.

De nona Cursus sessione...

2010-04-06T01:25:00.000-07:00

De octava Cursus sessione...

2010-04-06T01:24:00.000-07:00

Etiam de Cursu adhuc...

2010-03-20T13:23:00.000-07:00

De Cursu nostro progrediente...

2010-03-19T14:24:00.001-07:00

De imaginibus nonnullis

2010-03-09T10:50:00.001-08:00

Ecce imagines nonnullas ad quartam Cursus sessionem pertinentes, quibus pars eius diei continetur postrema. Multis earum mendis praetermissis ignotisque, vobis placeant valde cupimus.

De duabus postremis Cursus sessionibus

2010-02-16T05:12:00.000-08:00

Diebus Lunae primo necnon octavo mensis Februarii superioribus sessiones singulae celebratae sunt, quas sodales sueti participaverunt, addito nonnullo alio primum adhuc convenienti.

De quibus rebus? De scholis nostris, quomodo ipsi cottidie in eis versemur aliquantulum amplius tractare perreximus, iam mox ad alia nova nos contulimus: de humano enim corpore deque eius partibus formaque nonnulla diximus, unde recta ad indolem atque ingenium nostrum describendum (id quod alteram per totam sessionem proximam argumentum nobis sustinendum esse constat) statim transgessi sumus.

Superiore quoque sessione id quod nunquam adhuc fecerimus fecimus: rogatus cum essem a sodale quodam (qui proh dolor abesse a coetibus nostris varios per dies causa munere fungendi coactus est) ut sessiones habendas imaginibus exciperem, totam postremam excepi sessionem, quarum nonnullas hic monstro imagines, ceteras alias, easque visificas vivasque, id est, motu praeditas, mox inserere me conaturum promitto.

Et quid in proxima tractandum? De domo enim nostra deque familia quoque describenda, qua scilicet in urbe, qua in eius parte, quo in aedificio habitemus, qualibus quotque e membris gens nostra constet, qualem speciem domus nostra eiusque variae partes praebeat, alia simillima tractanda nobis putamus, illo autem sane comperto necnon servando, quod moderator tacere, participes autem magis ampliusque quam adhuc fecerunt colloqui debent..!

Gaudio permulto nobis aliquot novos sodales erit numerare, qui sessiones nostras futuras participare vellent . Nolite non venire...! Favete enim linguis: Latine usurpandum...!

De altera CVRSVS sessione

2010-01-30T02:23:00.000-08:00

Die 25 huius mensis, die scilicet Lunae, secunda nostri cursus sessio fuit, quam varii sodales participaverunt: Carmen, Maria Iesus, Pilar, Gilda, Carmen, Marcus Antonius, Petrus egometque Ansgarius adfuimus.

De argumento tractato si quis roget en: primum omnium de certo definitoque calendario nostro, quod iam e Lunae diebus singulis in novenis septimanis adhibitis prosequentibusque usque ad finem mensis Martii prorsus constabit; de instrumentis auxiliisque nobis ad cursum persequendum adhibendis; de itinere Legionem Aloisio Miraglia faciendo, quod iam ad diem undecimum mensis Februarii ipso Miraglia admonente suadenteque locavimus et constituimus; de argumento ad superiorem sessionem quod attinet recensendo.

Et quid amplius? Iam enim novam provinciam explorare conati sumus: de vita scholari, quo enim pacto fingere mente nostra possimus actiones sive imperata ea, quibus nos in scholis qui plerumque versamur, frequentius uti solemus. Quod non sine multis imaginibus iuvati fecimus, id quod periucundum amoenisimumque fieri solet. Adde etiam illud, quod postrema in parte sessionis imaginibus aliquot ducibus eis, quas e pellicula notissima illa cui titulus "De mortuorum poetarum sodalitate" deprompserimus, eas sive commemorare sive agere, totasque enim Latine ex tempore conversas et prolatas, temptavimus tali modo ut, tempore deficiente, multum adhuc laboris perficiendum in proximum diem restaret...

Convoco enim vos omnes, sodales comitesque nostros, ad novam sessionem, quam die Lunae primo mensis Februarii Deo iuvante celebrabimus. Stilos acuite, tabulas parate, animos advertite: Latinum usurpandum est!

De prima CVRSVS sessione habita

2010-01-23T03:58:00.000-08:00

Salvete omnes amici sodales participes comitatesque qui estis!

Iam CVRSVS VIVAE LATINITATIS noster initium cepit, neque infauste, ut opinor...! Octo enim participes adhuc computantur, alii autem exspectantur. Adde illud, quod nonnulli sunt qui non tam bene aut diem meminissent aut eis hora tam apta conveniendo evaderet, eo quo fit ut verisimiliter novi sodales progredientibus diebus nobis addantur.

Et quid de nobis? Maximo gaudio Rodericum nostrum, is qui Societati Latinae Vallisoletanae praeest eamque moderatur excepimus, cuius linguae Latinae peritia multum omnes nos iuvit. Ceteri autem sodales fere omnes convenimus: Pilar, Carmen, Maria Iesus, Michael, Laura ipseque scilicet, tales qui magnam operam linguae nostrae navare conemur.

Quod ad curriculum Cursus attinet, primam sessionem ad eius rationem, quomodo enim tempora eius dividenda, auxillis subsidiisque utendis, cetera alia adhibenda, explanandam dicavimus, denique autem formulas rationesque salutandi valedicendique tractavimus tali animo adhibito ut numquam melius ampliusque...

Proximam enim sessionem vobis omnibus iam nuntio die 25, Lunae scilicet die, hora locoque suetis habendam.

Veniatis! Loquamini! Valeatis quam optime!

De novo anni tempore ineundo

2010-01-11T12:04:00.000-08:00

Salvete omnes, amici sodales comitesque nostri!

Primum omnium faustum et pulcherrimum annum novum toto ex corde vobis vestrisque exoptamus! Quomodo tempus illud Natalicium se habuit? Et Reges illi Magi qui putentur, quomodo vobis sese praebuerunt? Perfidi et malevoli qui sitis, non dubito quin satis multum carbonis vobis tradiderint, nonne?

Nuntio vobis proximum CIRCVLI nostri conventum, quem Deo volente die 18 mensis Ianuarii, die nempe Lunae, constituendum nobis visum hoc argumento perspecto, quod eodem eademque hora CVRSVS VIVAE LATINITATIS, quae dicitur, suum capit initium, atque occasio optima nobis ad sodales alios cum cognoscendos tum frequentandos esse videtur.

Exspectamus ergo vos omnes die indicto, atque valeatis quam optime magnopere, immo pancratice optamus!

Venite ad nos!

Veniatis denuo: conventus iam erit...!

2009-11-21T09:17:00.000-08:00

Proximo Lunae die, ut noster iam est mos, dis iuvantibus negotiisque nostris minimum per temporis spatium remotis coetus loco horaque suetis habebitur. Quem libero animo documentis instrumentisque CVRSVS VIVAE LATINITATIS parandis ornandisque nos dicare haud alienum esse videbitur.

Veniatis ergo ad omnia pericula subeunda parati, immo e corde toto dediti...!

Valete commilitones in proximum!

De postremo coetu nostro

2009-11-14T13:15:00.000-08:00

Die 9 mensis hodierni postremum conventum instituimus, cui Pilar Carmen Michael Ansgariusque interfuimus.

De discipulis nostris, quo enim pacto ei nostris in scholis se habeant necnon methodum Oerbergianam quam vocant persequantur aliis alia aliquantulum probantibus reprobantibusve multa libero expeditoque animo gaudentibus diximus. Oportet scias, care quivis lector suavissime, nostra in Legionensi urbe iam septem saltem magistros magistrasve nunc temporis tali methodo uti, multis et frequentibus discipulorum turmis cottidie lectiones Latinas auscultantibus. Quorum autem magistrorum opinio fere universa victrix evasit ea, quam secundum melius antea solito discipuli discipulaeque quaelibet sive animum intendere sive peritiam quamdam Latinae linguae adipisci valere putantur. Adde etiam illud, quod non rari inter magistros magna clade etiam passa (quod numquam adhuc neque factum neque faciendum...!) se tali vitalitate necnon iucunditate, alacritate quoque impensa in scholis gaudentes, methodum illam ullo sine dubio secuturos autumant.

Ad proxima vero nostra incepta postea venimus: Ansgarius Legionensis ceteris sodalibus et praeconium et schedulam ad CVRSVM VIVAE LATINITATIS edendum quae paravit monstravit omnibus probantibus consentientibusque. Ecce documenta, quibus speramus fore CVRSVM ad multorum conspectum notitiamque pervenire possit:

Cursus Vivae Latinitatis

Schedula Cursus Vivae Latinitatis

De quibusdam aliis sermocinantes variis imaginibus visificis auscultatis conspectisque nos omnes, qui adhuc in conclavi mansueramus, valediximus atque in proximum nos destinavimus.

Noli, lector spectatisime, proximo conventui non interesse, quem ad tempus, ut nostra est mos, nuntiabimus! Neque nostrum CVRSVM VIVAE LATINITATIS praetermittere velis, ad quem omnes amatores cultores faventes linguae Latinae quilibet estis gratissimi convocamini...!

Valeatis quam optime!

De proximo conventu instituendo

2009-11-06T02:36:00.000-08:00

Nuntio vobis quibuslibet proximum CIRCVLI LATINI LEGIONENSIS conventum die 9, die scilicet Lunae, hora locoque suetis Deo intercedente fore.

Ad quem omnes amantes faventes studiosi cultoresque Latinae linguae convocamini. Veniatis!

De superiore conventu deque Paulo Villaoslada nostro

2009-10-30T10:17:00.000-07:00

Die 26 mensis Octobris, die nempe Lunae, hora sueta tempore feriisque aestivis plane peractis denuo convenimus. Quod non sine magno gaudio laetitiaque factum est, multa quisque narrare cupiens. Hac occasione conventui interfuerunt Pilar, Carmen, Maria Iesus, Michael Angelus, Ansgarius Legionensis, quos discipula nostra Laura maxima lenitate gaudens comitata est.

Adde insuper illud, quod Paulus Villaoslada, is qui Circulo Latino Matritensi praeest necnon moderatur primum ad nos venit, Circulum participavit, multa de ipso deque Circulo suo narravit. Advenerat enim Legionem hora tertia et quadrante postmeridiana, atque Ansgario Legionensi comitante praecipuas Legionis urbis vias lustravimus, aedificia notabiliora visitavimus, vestigia Romana quae exstant prospeximus, popinam quandam petimus.

Iam omnibus in auditorio scholastico congregatis moderator Circuli nova consilia sive incepta futura ceteris communicavit: de CVRSV VIVAE LATINITATIS proximo mense Ianuario ineunte Societate Hispana Studiorum Classicorum (apud Legionenses) favente qui initium faciet; de invitatione ad Aloisium Miraglia, conditorem et moderatorem Accademiae Vivarium Novum, nostrae urbis visendae necnon acroasis cuiusdam habendae, de ratione atque instrumentis ad Cursum Vivae Latinitatis adhibendis aptioribus quae sint, de quibusdam aliis...

Imaginibus nonnullis conspectis auditisque, quorum in numero sapidissimae eae quas Laura Gibbs illa profestrix mirifica ratione Aesopicarum fabularum aliquando paravi constituitque fuerunt, programmate ad linguam Latinam discendam utilissimo cui nomen Lapis Rosetta investigato, valedictionibus dictis grex in proximum se destinavit.

Valete omnes quam optime, amici comitantes sequentes faventesque quicumque estis...!

Ecce nos! Iam iam redimus...!

2009-10-12T02:22:00.000-07:00

Salvete omnes sodales comites amicique!

Gaudio permagno mihi vobis nuntiare CIRCVLVM LATINVM LEGIONENSEM nostrum tandem aliquando adesse.

Variis de causis, quae ad tempus explanandae, mora diuturnior solito conventui nostro hoc studiorum spatio ineunte fuit, quibus tandem amotis causis proximum coetum vobis futurum nuntio, Deo volente, die XXVI mensis Octobris, die nempe Lunae, hora sueta (quam horam sextam et dodrantem postmeridianam aliquando instituimus). De loco eligendo, quid scholare conclave 3.01 ad lyceum c. n. Ioannes Enzina quod pertinet vobis in praesentia videtur?

Numquid amplius? Videte quid amplius fit: Paulus Villaoslada, humanissimus doctissimusque vir, idemque praeses moderatorque CIRCVLI LATINI MATRITENSIS, nuperrime se proximo nostro conventui interfuturum mihi nuntiavit, quod non sine gaudio omnium permagno fieri poterit: venias, Paule, exspectatissimus!

In proximum, amici comitesque omnes!

De praeconio deque convivio proximo

2009-06-06T12:27:00.000-07:00

Salvete omnes!

Nuntio vobis convivium nostrum proximum in thermopolio cui nomen GRAECVS SAPOR die 11 mensis hodierni, die nempe Iovis, fore.

Agite ergo, amici amicaeque, animos tollite -iam tuba non taratantara, sed finem cursus terribile sonitu dicit nuntiatque- atque ad sapidissima colloquia instituenda necnon ad cachinnos permagnos emittendos simul convenite!

Hora secunda et dodrante postmeridiana hoc in loco exspecto vos omnes.

Valete interea quam optime!

De postremo nostro conventu

2009-05-31T09:36:00.000-07:00

Die 25 mensis Maii, die nempe Lunae, in popinam deversorii cui nomen QUINDÓS media in Legionensi urbe siti membra omnia CIRCVLI nostri convenimus, ubi per duas fere horas multis de rebus colloquia sapidissima instituimus, quorum maxima pars ad acroasim ab Ansgario die Mercurii praeterito in Universitate Legionensi de methodo illa Orbergiana habitam (non satis bene, ut patet!) pertinuit.

Cuius dissertationis occasio conventus Societatis Hispanae Studiorum Classicorum (apud Legionenses) fuit, in quem parvus magistrorum professorumque numerus congressus est ut res ad linguas cultusque classicos spectantes servare et augere possint. Cui consociationi nostra in urbe Iesus Maria Nieto, cathedrarius professor linguae Graecae qui est, nonnullis ab allis sodalibus iuvatus praest, inter quos Emmanuel Marcus Casquero, professor cathedrarius linguae Latinae, numerari debet. Omnes qui una cum variis sodalibus discipulisque magna cum intentione animum adverterunt primum ad verba quaedam de Platone a Francisco Lisi, cathedrarius professor quoque linguae Graecae in Universitate cui nomen Carolus III, Matriti sita, sapienter facta, postea ad tremula et mendis plena verba mea de methodo Orbergiana quae dixi.

De opportunitate necnon beneficio talis methodi in conspectu discipulorum discipularumque hodiernorum cum ad secundarium gradum tum ad Universitatem pertinentium nonnulla diximus hoc argumento speciatim adhibito, ut discipuli cuiusquam linguae discendae auribus maxime uti debeant, qua causa magistris magistrabusque non solum rationes grammaticae explanandae sed etiam creberrima colloquia ipsa lingua instituenda esse videntur, quod nostris in scholis raro adhuc fit, eo quo tempus iam adest immo urget talia facere eademve saltem conari...Ecce ergo imagines nonnullas, quae refertae mendis cum sint, maxima venia benevolentiaque vobis accipiendae sunt...

Magno cum gaudio novum amicum nostrum in sinum accepimus, nomine Danielem, qui discipulus noster aliquando fuit, atque proh dolor Lauram eiusque quemdam amicum, quibus nuntio conventus nimis ambiguo locum erratum petere contigit, accipere non valuimus. Proxima enim occasione meliore fortuna adhibita una conveniamus speramus fore.

De quibusdam aliis tractavimus quoque: de locis exempli gratia notissimis quos apud scriptores Romanos antiquos invenire possimus: exemplum unum proponam: Daniel iste, de quo modo locutus sum, rogatus a quodam qua causa curam maximam studiis linguae Hispanicae hoc tempore det atque cordi ipsi lingua Latina sit, "aliquando, inquit, magister de Vilhelmo Studemund nonnulla narravit: quo pacto et quo furore tractus maluerit visum perdere quam investigationem de Plautinis operibus omittere". Scistisne omnes sine dubio de qua re agatur: Vilhelmus Studemund, oculis laborans causa acidi liquoris eius, quo ad verba pristina in palimpsesto quodam subscripta elucidanda utebatur, medicum visitavit, qui ei nisi laborem deposueret eum caecum plane fore asseveravit. Vilhelmus tunc laborem perrexit, ad cuius extremum caecus enim totus factus est. Editione prima operum Plautinorum in lucem edita, talibus verbis, e carmine Catulli quodam depromptis, frontem libri Vilhelmus ornavit: "Ni te plus oculis meis amarem..." quae Catullus de amica sua dixerit et videlicet discipulus noster in aeternum memoriae suae mandaverit...

Ceterum ad finem scholaris temporis celebrandum convivium quoddam constituendum decrevimus, quo facilius sive facta praeterita commemorare sive consuetudinem nostram confirmare valeamus, eo quo thermopolium nonnullos intra dies petemus, nomen cuius locumque ad tempus in lucem edetur.

Satis adhuc. Valete omnes amici comitesque nostri in proximum!

De praeconio

2009-05-24T07:42:00.000-07:00

Omnibus sodalibus amicisque CIRCVLI LATINI LEGIONENSIS plerumque participantibus magno cum gaudio novum conventum Lunae die proximo hora sueta in loco insueto fore nuntio.

Cuius mutationis loci causam, si quis rogat, videte: nonnulla enim membra popinam deversorii nomine QUINDÓS petendam proposuerunt eo consilio, ut alia ad conventus nostros parata loca inveniri possint.

Praebeo ergo vobis photographema atque viarum formam, quibus pedes vestros regere valeatis.

In proximum, sodales omnes!

De superiore conventu nostro

2009-05-06T08:15:00.000-07:00

Tandem aliquando calamum manu sumo nonnulla eorum, quae apud nos superiore in conventu evenerint, narrare conaturus. Qui coetus, die 27 mensis Aprilis institutus, similior solito non fuit, dum cogites nos novis atque adhuc insolitis rebus gaudere valuisse.
En primum omnium illud, quod minimi momenti esse videtur: locum enim conveniendi mutavimus, quod non magno sine commodo fecimus, nam popina illius deversorii nuperrime inventa aptissima atque paratissima sive incepto sive gaudio nostro tandem fuit.

Adde etiam multo maioris ponderis illud, quod visitatores ad nos advenerunt, iique ornatissimi: nam Rodericus amicus, is qui CIRCVLO LATINO VALLISOLETANO praest, praesentiam suam pridie praenuntiaverat, eo quo magna cum expectatione eum exspectabamus dum appareret, qui aliquantulum per urbem errabundus (quod mirandum est: Legio nostra non tanta esse videtur...!) paululum tardatus oecum nostrum tandem repperit. Narravit enim ille de Circulo suo deque eius membris, atque nonnulla de superioribus V Itineribus Cultus Classici.com Ursone habitis sermone suo Latino ita expedito atque pulcherrimo, quem iam nonnulli noverimus.

Adhuc ipso loquente apparuit modo Michael, vir magna humanitate necnon familiaritate, magister qui multos iam per annos Hispanicam linguam Latinamque discipulos discipulasque docet, idque eximie.

Et quid amplius? Ecce Pilar nostra de itinere eo, quod in Italiam fecit, pauca narravit, quibus certiores nos fecit se atque discipulos discipulasque eius una plurimis aliis condiscipulis condiscipulabusque peregrinis congregantibus iucundiores, pauci qui fuerint, dies degisse. Cum tempus valedicendi adfuit, nonnullae lacrimae (ad Italicos discipulos maxime quae pertinent), de oculis fussae fuerunt, si verbis nostrae amicae credendum est...

Si quis forte quibus de rebus nos tractaverimus nostra in contione roget, videat de quibus: de conventu illo imprimis Ursone habito, deque dissertationibus sive Latino sive Hispanico sermone in eius gremio habitis, quarum in numero eae a Ludovico Miraglia, necnon a Theodorico Sacré totae Latine habitae luculentissimae reputari debent, siquidem imagines nonnullas conspicitis, quas infra induco.

Primus Theodoricus ille, professor in Universitate Catholica Lovaniensi egregius necnon fautor ACADEMIAE LATINITATI FOVENDAE multa optimeque de Vivis et Erasmi colloquiis inter se comparatis dixit, et quo maxime eorum scripta differant, ubertate nempe linguae atque varietate argumentorum quod ad Erasmum pertinet, difficultate necnon obscuritate verborum tantum ad scholas dicatorum, quod ad Vivem.

Secundus Aloisius Miraglia locutus, plurima de nova Bibliotheca Latina deque auxiliis ad methodum Orbergianam iungendis disseruit sermone eo Latino suo expeditiore venustissimoque, qui omnium animos illicere valeat.

Cuius e relatione pauci ponderis illud esse non puto, quod nonnulli sunt magistri -Aloisio Miraglia iudice loquenteque- qui libro tantum neque methodo Orbergiana utantur, ii qui novo libro adhibito eamdem rationem docendi sequuntur ac antea secuti erant, quod nihil aliud nisi maximum deliramentum esse videatur...

Conspicite quoque imagines ceteras, quibus coetus participes ulli monstrantur.

Ceterum imagines nonnullas cepimus, quarum hic vobis non multas monstro.

Hactenus haec hodie. Convoco enim vos sive suetos sive adhuc ignotos commilitones ad proximum coetum die Lunae adveniente eodem loco eademque hora constituendum...

Valete interea quam optime, amici amicaeque!

De nuntio quodam

2009-04-25T16:23:00.000-07:00

Sodalitas re vera eorum, quibus totum per orbem terrarum Circulos Latinos curare atque tenere cordi est plurimis in rebus apparet, sed praecipue in illo, quod ita bene pulcherrimeque inter nos monemus necnon invicem suademus: non aliter enim nunc temporis factum est, quia mihi sodales et amicos perplurimos Ursonem nuperrime conventos occurrenti oportune contigit eos de suis conventibus mihi nonnulla narrare, de quibus mox nobis ad mensas discumbentibus occasio erit colloquendi...

Ceterum vobis nuntio me locum novum ad contiones nostras habendas aptissimum, ut videtur, invenisse, deversorium nempe cui nomen NH in platea magna apud Vicum Madidum, quem dicunt, situm. In eius ergo popina vel thermopolio Lunae die proximo sueta hora vos exspecto. Moram nullam faciatis.

Valete in proximum omnes quilibet!

De coetu superiore nonnulla

2009-04-04T16:24:00.000-07:00

Infeliciter nobis contigit ut popina illa, quam die Iovi proximo petivimus, ornata quae videatur idque plurimis necnon pulcherrimis tabulis pictis, non tam apta ad conventum placidum serenumque fieret. Qua causa forte quis roget. Ecce causa: mos Hispanus taeterrimus ille sublatissima et immanissima voce colloquendi ubique viget, ita ut perbelle audias quod non vis, vix audire possis quod vis. Adde etiam illud, quod permulti sunt qui fumificent, eo quo res satis molesta mox fiat. Debemus ergo alium locum aptiorem quaerere.

Quibus obstantibus, coetus autem noster amabilis et iucundus evolutus est, quem tria tantum membra constituimus: Montserrat enim et Maria Iesus munere academico in schola sua fungi hac hora debuerunt, Violeta autem incommodo quodam morbo tres quattuorve per dies laboravit, ipsa quae iam Deo gratias fere plane convalescit.

De re technologica nonnulla colloquimur, de arte nempe blogorum interretialium conficiendorum deque eorum commodo emolumentoque multo quod discipuli obtinere valeant. Atque de proximis nostris itineribus, quae Pilar et Ansgarius facere debemus, haec Venetias, una cum discipulorum discipularumque grege hospites Italos sub nomine programmatis c. n. Comenius visitandos; Ursonem autem ille, ad sodales alios multos, qui V Itinera Cultus Classici.com participant, conveniendos. Quibus de rebus ad tempus narrandum est...

Ceterum proximum diem certum ad coetum faciendum instituimus, die nempe 27 mensis hodierni, sueta hora atque denuo in popina nomine Varsovia, ubi speramus fore ut angulum quemdam aptiorem inveniamus sive vocibus sive fumis vacuum...

Valeatis interea omnes...!

De Circulo Latino nostro nonnulla...

2009-03-21T13:58:00.000-07:00

Circulus Latinus Legionensis iam est! Pergratissimi ergo ad nos, cari visitatores, advenistis! Singulis Lunae diebus quindenis diebus intermissis hora sexta et dodrante postmeridiana in lyceum c. n. "Iohannes Enzina" Legione in urbe convenire solemus, quem ad conventum vos quoslibet cultores fautoresque Latinae linguae adventuros libentissime exspectamus...!

Ceterum ecce nos: primo in photographemate a laevo ad dextrum Pilar, Violeta, Carmen, Maria Iesus atque Monserrat apparent; in secundo autem inest quoque Ansgarius Legionensis (Óscar Ramos Hispanico more), omnes qui variis in Legionensibus lyceis maximam curam Latinae linguae apud discipulos discipulasque cottidie damus.

Nolite non ad nos aliquando venire...!